2 Kings 2
1 上主用龍捲風接以利亞升天个時節到了。以利亞㧯以利沙對吉甲出發；
2 在路上，以利亞對以利沙講：「你留在這位；上主吩咐𠊎到伯特利去。」以利沙應講：「𠊎指等永生个上主㧯你發誓，𠊎絕對毋離開你。」所以佢兩儕共下到伯特利去。
3 有一群住在伯特利个先知出來見以利沙，問佢：「你知今晡日上主愛將你个先生接走麼？」以利沙講：「𠊎知；總係你等莫講這事！」
4 以利亞對以利沙講：「你留在這位；上主吩咐𠊎到耶利哥去。」以利沙應講：「𠊎指等永生个上主㧯你發誓，𠊎絕對毋離開你。」所以佢兩儕共下到耶利哥去。
5 有一群住在耶利哥个先知來見以利沙，問佢：「你知今晡日上主愛將你个先生接走麼？」以利沙講：「𠊎知；總係你等莫講這事！」
6 以利亞對以利沙講：「你留在這位；上主吩咐𠊎到約旦河去。」以利沙應講：「𠊎指等永生个上主㧯你發誓，𠊎絕對毋離開你。」所以佢兩儕共下行。
7 有五十個先知跈佢兩儕到約旦河去。以利亞㧯以利沙停在河壩滣；五十個先知企在離佢等無幾遠个地方。
8 以利亞脫下佢个外衫，將它捲起來𫝾水，水就分做兩片。佢㧯以利沙就對燥地上行過去，到河壩該片。
9 佢等過河以後，以利亞問以利沙：「𠊎吂被上主接去離開你以前，你愛𠊎為你做麼介？」以利沙講：「願感動你个靈加倍傳給𠊎，使𠊎成做你个繼承人。」
10 以利亞講：「你所要求个盡難得。毋過，你若係有看到𠊎被上主接去，你就會得到；若無，你就得毋到。」
11 佢等緊行緊講。忽然間，有幾條火馬拉等一輛火戰車來到佢等中間，將佢兩儕隔開，以利亞在一陣龍捲風當中被上主接上天去。
12 以利沙看到就大聲喊：「阿爸啊，阿爸啊！以色列个戰車㧯騎兵啊！」以利沙就無再看到以利亞。以利沙當悲傷，就將自家个衫扯做兩析，
13 然後拈起以利亞跌下來个外衫，轉到約旦河滣企等。
14 佢用以利亞个外衫𫝾水，講：「上主—以利亞个上帝在㖠位？」然後，以利沙又𫝾水，水就分做兩片，俾佢行到河壩該片去。
15 耶利哥來个五十個先知遠遠看到，就講：「感動以利亞个靈已經臨在以利沙身上。」佢等就去迎接佢，伏在佢面前，
16 講：「𠊎等這位有五十個人，全部當紮；請俾𠊎等去尋你个先生。可能上主个靈帶走佢，將佢放在毋知㖠隻山頂抑係山壢。」以利沙應講：「毋使派人去。」
17 總係，佢等強強愛去，以利沙就由在佢等去。該五十個人尋三日也無尋到。
18 所以佢等轉到以利沙該位。以利沙在耶利哥等佢等；佢對佢等講：「𠊎敢毋係㧯你等講過毋使去？」
19 有人對耶利哥城來見以利沙，講：「先生，你知這城个地點當好；總係這位个水毋好，土地毋肥毋會出產。」
20 以利沙講：「拿一隻新碗裝兜鹽來。」佢等就拿來給佢。
21 以利沙行到水源頭，將鹽倒在水肚，講：「上主恁樣講：『𠊎使這水變好，毋會再有死亡，也毋會再影響出產。』」
22 所以該水變好直到今晡日，就像以利沙所講个。
23 以利沙對耶利哥上伯特利去；在路項，佢堵到一群細人仔對城肚出來。佢等嘲謔佢，喊講：「光頭仔，好去了！光頭仔，好去了！」
24 以利沙轉身過來，䁯佢等，奉上主个名咒詛佢等。就有兩隻熊乸對樹林肚出來，扯爛佢等當中个四十二儕。
25 以利沙對伯特利到迦密山去，然後又轉到撒馬利亞。